सीएनएन का अनुसार अमेरिकी गुप्तचर स्रोतले इरानले हर्मुज जलडमरू (स्ट्रेइट अफ हर्मुज) मा ‘समुद्री बारुदी सुरुङ’ (माइन) राख्न सुरु गरेको जानकारी दिएका छन्। यो मार्ग विश्वको सबैभन्दा महत्त्वपूर्ण ऊर्जा मार्ग मानिन्छ, जसबाट ठूलो मात्रामा कच्चा तेल ढुवानी हुन्छ। हालसम्म ठूलो परिमाणमा माइन राखिएको छैन, तर केही दर्जन माइन पानीमुनी राखिएको बताइएको छ। स्रोतका अनुसार इरानसँग अझै ८०–९० प्रतिशत साना डुंगा र माइन बिछ्याउने उपकरण बाँकी छ, जसले आवश्यक परे सयौँ माइन राख्न सक्ने क्षमता दिन्छ। इरानको इस्लामिक रिभोल्यनरी गार्ड कोर्प्स (आइआरजीसी) ले हर्मुज जलडमरूमा परम्परागत नौसेनासँगै प्रभावकारी नियन्त्रण कायम राखेको छ। आइआरजीसीसँग साना जहाजबाट माइन बिछ्याउने, विस्फोटकयुक्त डुंगा प्रयोग गर्ने र किनारबाट मिसाइल प्रहार गर्ने क्षमता रहेको छ। डोनाल्ड ट्रम्प ले आफ्नै सामाजिक सञ्जाल ट्रुथ सोसलमा भने, “यदि इरानले हर्मुज जलडमरूमा माइन राखेको छ भने तुरुन्त हटाइनुपर्नेछ। नभए भने अहिलेसम्म नदेखिएको परिणाम भोग्नु पर्नेछ।” उनले भने, माइन हटाइएमा त्यो सही दिशातर्फको ठूलो कदम हुनेछ। पिट हेगसेथ, अमेरिकी रक्षामन्त्री, ले ट्रम्पको निर्देशनमा अमेरिकी सेन्ट्रल कमाण्डले हर्मुज जलडमरूमा रहेको माइन राख्ने निष्क्रिय जहाज नष्ट गरिरहेको बताएका छन्। सेन्ट्रल कमाण्डले केही इरानी नौसेनाका जहाज नष्ट भएको दाबी पनि सार्वजनिक गरेको छ, जसमा १६ वटा माइन राख्ने जहाज समावेश रहेको जनाइएको छ। इरानले जलडमरू पार गर्ने जहाजमाथि आक्रमण गर्न सक्ने चेतावनी दिइसकेको छ। यस मार्ग अहिले प्रभावकारी रूपमा बन्दजस्तै भएको छ र केही स्रोतहरूले यसलाई ‘मृत्यु उपत्यका’ जस्तो खतरनाक अवस्था भएको बताएका छन्। अहिले दैनिक १ करोड ५० लाख ब्यारेल कच्चा तेल र ४५ लाख ब्यारेल प्रशोधित इन्धन खाडी क्षेत्रमा अड्किएको छ। इराक र कुवेत जस्ता देशहरूको तेल निर्यात विकल्प लगभग हर्मुज बाहेक छैन। यस संकटका कारण जी–७ समूहले बजारमा अभाव पूर्ति गर्न थप तेल भण्डार सार्वजनिक गर्न सक्ने संकेत गरेका छन्। https://youtu.be/PbWnlk5sDJQ